യാക്കോബായ സുറിയാനി സഭയില്‍ പുനരുജ്ജീവിപ്പിക്കപ്പെട്ട ഇടുക്കി ഭദ്രാസനം വളര്‍ച്ചയുടെ പടവുകള്‍ താണ്ടുകയാണ്. 2008 ഏപ്രില്‍ 16 ന് മലങ്കര സഭയുടെ യാക്കോബ് ബുര്‍ദ്ദാന ശ്രേഷ്ഠ കാതോലിക്ക ആബുന്‍ മോര്‍ ബസേലിയോസ് തോമസ് പ്രഥമന്‍ ബാവായാല്‍ സഭയ്ക്കായി സമര്‍പ്പിക്കപ്പെട്ട ഇടുക്കി ഭദ്രാസനത്തിന് സഭാ കേന്ദ്രത്തില്‍ നിന്നും ലഭിക്കുന്ന സഹായങ്ങള്‍ വിസ്മരിക്കാവുന്നതല്ല്ല. വളരെ വിസ്തൃതമായ ഒരു ഭുപ്രദേശമുള്ള ഈ ഭദ്രാസനത്തിലെ പള്ളികളേയും വിശ്വാസികളേയും സത്യവിശ്വാസത്തില്‍ പിടിച്ചു നിര്‍ത്തുന്നതിന് പ.സഭാ നേതൃത്വം സ്വീകരിക്കുന്ന എല്ലാ നടപടികളും പ്രശംസാര്‍ഹം തന്നെ.

1981-ല്‍ അഭിവന്ദ്യ ഫീലിപ്പോസ് മാര്‍ ഈവാനിയോസ് മെത്രാപ്പോലീത്താ ഇടുക്കി ഭദ്രാസനത്തില്‍ നിന്നും പോയപ്പോള്‍ നിലവിലുണ്ടായിരുന്ന പള്ളികള്‍ കോട്ടയം, കണ്ടനാട് ഭദ്രാസന ങ്ങളില്‍ ചേര്‍ന്ന് പ്രവര്‍ത്തിച്ചു വരികയായിരുന്നു. പിന്നീട് ഇതുവരെയുള്ള കാലം ത്യാഗോജ്വലമായ ഒരു പ്രവര്‍ത്തനമായിരുന്നു ഈ മേഖലയിലെ വൈദികരുടേയും വിശ്വാസികളുടെയും. കോട്ടയം കണ്ടനാട് ഭദ്രാസനങ്ങളില്‍ നിന്നും ഈ മേഖലയില്‍ ശുശ്രൂഷിച്ചിരുന്ന വൈദികര്‍ ഇടുക്കി ഭദ്രാസനത്തിന്റെ രൂപീകരണത്തോടെ ഇവിടെ നിന്നും അതാത് ഭദ്രാസനങ്ങളിലേക്ക് പിന്‍വലിക്കപ്പെട്ടപ്പോള്‍ ഇവിടെ ഉണ്ടായ വൈദികരുടെ കുറവ് പരിഹരിക്കുന്നതിന് ഏറെ പരിശ്രമിച്ച ശ്രേഷ്ഠ ബാവാതിരുമനസിനോടും മറ്റ് എല്ലാവരോടും ഉള്ള നന്ദിയും കടപ്പാടും ഈ അവസരത്തില്‍ രേഖപ്പെടുത്തിക്കൊള്ളുന്നു.